中環出更：鄺美雲辦講座 名人齊養心
由一班城中專業婦女成立嘅「養心匯」，日前號召姊妹們齊「養心」，副主任鄺美雲（Cally）帶頭滋養心靈，喺九龍灣香港佛光道場舉辦「心靈DNA」講座，Cally不忘講吓佛偈，話幸福要靠自己爭取，開心與否，全靠改變心境。今次Cally專程請來佛光山中港澳區總主持滿蓮法師分享快樂之道，一眾名人包括港島婦女聯合會主席張雅麗、眼科醫生周伯展伉儷等，都去為心靈充電。
講座開始前，茹素多年嘅Cally，就為逾百賓客預備豐富齋菜，等大家清吓腸胃。做得咁投入，皆因Cally心中有座右銘，就係「有緣，盡力而為；無緣，急流勇退」。佢話學會凡事唔強求，懂得感恩、放下，煩惱自然一掃而空。佢又坦言，人生並非一帆風順，但每次考驗來，都會視為一種磨練，唔會輕易被逆境打沉。
張芯瑜返西安 唔認得路
唔少人認為Cally生活富裕無憂，大可印印腳歎世界，但佢堅持工作，下月將為公司品牌舉辦珠寶展，又去江西景德鎮拜會陶瓷大師，愈忙愈開心。身兼西安市政協嘅張芯瑜（Amy）就啱啱遊西安探親，佢家族喺當地有地產、金礦等投資，最近仲開埋幼稚園。佢笑言，家鄉發展一日千里，每次返去，變化到已經唔認得路，而此行大擦甜美西瓜及羊肉泡饃，恨不得空運返香港喎。
卓妮