劏呀劏，劏呀劏，全港單位劏劏劏！
本地最具特色嘅建築文化係豆腐膶咁大嘅劏房琳琅滿目，而且種類繁多應有盡有，嚴格而言其實係「應無盡有」。普通住宅有劏房，工廠大廈有劏房，豬欄雞寮有劏房，連理應神聖不可侵犯嘅教堂亦有劏房，貪圖分租利潤嘅無良業主搞到港產貧民窟無處不在。大家又有冇諗過，原來用以傳道授業解惑嘅課室都可以變劏房？
近日網上出現大量補習社或者教育中心嘅招租廣告，內容大致係話有課室出租。好似其中一間位於油麻地嘅教育中心咁吖，記者按圖索驥依照廣告內容所示登門造訪，接待嘅女職員就話嘞，教育中心有兩大三小嘅課室出租，可以容納九至三十人，時租由一百二十元起。當記者問到教育中心分租課室是否有必要向教育局申請牌照嘅時候，女職員斬釘截鐵咁話：「唔需要！」而且進一步解釋：「我哋教育中心已經領咗牌，你唔使再額外領牌o架，而我同你只係租客關係。」
實情係咪咁呢？當然唔係啦，有人擘大眼講大話就真。根據教育條例，如果一間註冊或臨時註冊嘅學校，將課室分租畀其他機構營辦或合辦教育課程，學校同租用者都違反教育條例，一經定罪可處罰款二十五萬元及監禁兩年。至於租用者向學生提供教育課程，冇向教育局註冊亦係犯法o架。
持牌教育中心將課室分租出去已經唔啱數啦，如果透過班房變劏房圖利嘅竟然係無牌補習社，簡直係罪加一等。銅鑼灣就有一間無牌補習社，不但訛稱已取得教育牌照，而且公然將課室分租畀街客，可以算得上係目無法紀。
你知啦，無牌經營呢家嘢可大可小，萬一好話唔好聽發生火警，學生隨時危危乎之餘，保險仲冇得賠添o架，你話唔係心慌慌就假。又或者，提供教育課程嘅知識供應商失驚無神突然倒閉，交咗學費嘅教育消費者好難追討損失。好衰唔衰嘅就係，教育局過去三年居然對於課室違規分租嘅情況採取嚴重失聰嘅聾耳陳政策，檢控數字係零，變相助紂為虐。
講真吖，形形色色嘅劏房係樓價租金太昂貴嘅後遺症，如果香港嘅房屋政策唔係長期失衡，未必有咁多人走法律罅，利用狹小到冇朋友嘅空間滿足永無止境嘅需求。教育中心將班房分租出去，其中一個原因可能就係頂唔順貴到離譜嘅租金。
所以講到尾，要杜絕劏房就要撥亂反正，特區政府必須將房屋政策好好平衡一下，唔好繼續容許樓價租金成為香港人嘅集體噩夢！