政情：大球場丟架 馬逢國灰到無言
香港大球場近日發生草地變爛地嘅事件，立法會體育、演藝、文化及出版界議員馬逢國就好似潛咗水咁，聲都冇出過。不過，佢尋日應我哋查詢，話自己對今次事件感受好深，尤其喺香港本地足球隊傑志大戰英超班霸曼聯時，佢正身處曼聯主場，兩地同樣落過幾場雨，但香港大球場變咗一片泥濘，而曼聯主場依然綠草如茵，令人羨慕，對比實在太強烈咁話。但點解唔出句聲呀？馬逢國好灰咁話，唉，都唔知點講喇。莫非身在天堂講唔出地獄嘅苦況？
指換草實平過英國
馬逢國話，其實業界就香港大球場草坪問題，已講過好多次，佢亦提過好多次康文署設施落伍，例如紅館嘅設施不足，羽毛球賽時要重新鋪過地板，音樂會嘅音響又落後等等，但一直未得有關部門跟進。而英國球場就每十年換一次草，以曼聯主場而言，換草只用咗一百萬英鎊，即約一千二百萬港元，但香港大球場十多年都未換過草，相信若要換草嘅話，一定會平過英國喎。