政情：今日你上鏡：阿容初為人母 網晒全家福
喺上屆元朗區議會選舉打敗工黨李卓人嘅工聯小花劉桂容（阿容），已經做咗人阿媽喇！阿容丈夫、荃灣區議員葛兆源（阿源）尋日喺網上上載咗兒子出世後一家三口嘅照片，話經過咗三十小時嘅生產過程，BB終於喺早上十時二十一分出世！
三口家同月生日
我哋打電話恭喜阿源，佢話BB重七磅幾，阿容前晚作動入院後，BB至尋日朝早出世，成個過程好順利。但新任爸爸一直都唔敢抱BB，因為怕整傷BB喎。至於BB會改咩名呢？阿源就話，暫時只係叫阿B咋，可能叫奕希，但仲未決定。阿容、阿源同阿B都咁啱喺七月生日，咁以後工聯阿媽、阿爸及阿B咪可以一齊慶生囉！