政情：楊大偉爆金刀梁好定力
綽號「金刀梁」嘅港大校務委員會主席梁智鴻出晒名魄力驚人，已屆七十五歲嘅佢依然頭腦靈活、身手敏捷。尋日金刀梁出席飯局時，就畀社企Green Monday創辦人之一楊大偉（David）大爆其趣事。話說有次兩人一同到四川同甘肅扶貧，搭完飛機又坐長途車，路途相當崎嶇，金刀梁竟然仲可以喺車上睇文件，真係寫個服字畀佢。
David話，嗰次佢哋坐朝早七點飛機，金刀梁半夜喺養和醫院巡完房直接趕到機場，好似唔使瞓咁。落機之後，佢哋轉搭九小時長途車到偏遠山區，David形容路途顛簸，坐車坐到似騎馬，但金刀梁竟然「騎住馬」睇文件。最後佢哋完結行程返港，金刀梁一落機又趕返醫院巡房。
講番個飯局，前民政事務局常秘「媽打」李麗娟早前走入錄音室開咪，訪問城中五十位傑出女性，各界好評如潮，遲啲再接再厲，訪問三十位成功男性。向來人緣佳嘅媽打，今次碌爆人情卡，搵來金刀梁、David、前賽馬會主席陳祖澤等，大爆佢哋鮮為人知嘅一面。