政情：中年翻波 孤舟漂流

仲有幾多未爆？

綜合多位政界人士分析，今次陳茂波出事後，陳茂波即時出嚟澄清，本來係好對策，但點知再被傳媒引爆第二個炸彈，而陳茂波仍然係好被動咁交代情況，問一句講一句。

有人形容陳茂波被傳媒一輪轟炸後，現時好似坐喺隻爛船上面，但水底仲有無其他魚雷會被引爆，得陳茂波自己至知，甚至連陳茂波都唔知，得佢老婆至知。試問咁危險嘅情況，一班坐喺豪華郵輪上嘅錫身建制派，又點會無喇喇向爛船上嘅陳茂波伸以援手，你估佢哋唔驚跟船太貼齊齊被炸咩？

所以到目前為止，都係得陳鑑林、蔣麗芸同保險界陳健波肯去救災，其他建制派表面無出聲，實質老早叫船長將隻「建制郵輪」駛得咁遠得咁遠，寧願用望遠鏡觀察，等陳茂波隻船爆得一乾二淨，屆時陳茂波隻船如果仲未沉，佢哋就會開始幫手，反之就會叫陳茂波棄船好過。

因果循環必有報，無人肯同陳茂波坐一條船，議會內無晒朋友，事必有因。其中一個主因就係陳茂波當年做議員時太獨行獨斷，同其他建制派牙齒印太深，好似當年佢做議員個人利益監察委員會，多位議員就被佢親手「煮」過，好聽啲就叫公正嚴明處理，但班建制派眼中，當然覺得佢唔識撈。

僅三議員出聲 力量微弱

講番陳鑑林、蔣麗芸同陳健波願意出口相救，其實都有其原因，其中陳鑑林旅行返嚟睇定至開口，都係想鞏固佢建制派重炮手嘅地位。蔣麗芸叫做由頭撐到尾，係其性格使然。而陳健波就因為同茂波實在太老友，其他識諗識計嘅議員都翹埋雙手睇戲，咪就因為深明幫手都無着數囉。