中環出更：黃家和赴澳洲 撐港式奶茶大賽
每年一度嘅金茶王大賽都會喺世界唔同地區舉行分區賽，而最後一站喺澳洲悉尼懷得市嘅賽事都已經圓滿舉行，各勝出者將於本月中來港同場較量。咖啡紅茶協會主席黃家和（Simon）早前特別趕往悉尼出席活動，佢好高興咁話，賽事首次獲得國會議員支持，證明大賽已經愈來愈受到當地政府嘅重視。
國會議員大讚層次豐富
Simon透露，當地有唔少唐人聚居，所以港式奶茶文化好濃厚。澳洲國會議員John Alexander於大賽中坐足全程，又品嘗港式奶茶，大讚味道比澳洲嘅奶茶有層次得多。Simon話，對方好想了解多啲港式奶茶點解會咁受歡迎，當佢話畀對方知道，港人每日消耗二百五十萬杯港式奶茶時，對方都大嚇一跳。
Simon仲話，今次比賽邀請到懷得市嘅署理市長李穎斌出任評判，呢位只有三十歲嘅美男市長，係生於香港嘅八十後，同Simon一樣好鍾意飲奶茶，二人特別啱嘴形。Simon話，最感動係有移居澳洲多年嘅九旬長者都專登過嚟觀賽，為歎一杯正宗港式奶茶，令佢更有決心將港式奶茶文化發揚光大。
卓妮