香港大球場草地變爛泥地，用嚟填補泥窿嘅沙粒，又懷疑因康文署粗心大意，無事先篩走裏面嘅碎石、貝殼同膠粒，不但搞到來港作賽嘅英超冠軍「紅魔鬼」曼聯差啲要求取消賽事，以免令落場球員受傷，同時亦令事件成為國際大笑話。將來政制及內地事務局局長譚志源推銷政改方案時，大可以用今次爛地醜聞做例子，反證特首選舉有篩選係有必要嘅，如果唔篩走啲反中亂港嘅絆腳碎石，幾叻幾勁嘅人腳落場都可能會跣親受傷，甚至取消賽事都有之。有咁好嘅例子，民政事務局局長曾德成豈不是立咗功？
