社民連自從大前年分裂出人民力量後，動員力同號召力都已經大不如前，但近月人民力量內鬥，又令社記人氣升番少少，好似早前反發展局局長陳茂波遊行，文遠身邊總有幾位年輕貌美OL同女大學生支持者，佢亦承認近呢半年社記不乏生力軍，支持者亦唔少，但無人肯行前多一步參選，係社記最大困擾。
長毛年紀大 獨力難支
長毛都已經五十七歲，社記唔可以一味靠長毛打江山，所以有人向吳文遠獻計，不如向學民思潮招手，文遠話聽聞有幾位學民仔都入咗社記，但就唔知係邊個，而佢就有一個心水人選，但就賣關子唔講住，總之唔係黃之鋒喎。不過，就算學民仔加入，都要等佢哋夠年齡先至有資格參選，即係遠水救唔到近火囉。