政情：盛事基金醜事鑊鑊甘
由政府盛事基金贊助八百萬元嘅曼聯對傑志表演賽尋晚舉行，原本諗住藉球賽宣傳香港，但勢估唔到令香港揚名海外嘅唔係呢場球賽，而係香港大球場一片光禿禿、隨時令球員受傷嘅爛泥草地。其實盛事基金近年搞活動認真唔好彩，次次唔係遇着打風，就係差啲火燭，今次仲搞到爛草地，令香港淪為國際笑話，睇嚟盛事基金主席林健鋒真係要拜神兼檻過火盆至得嘞！
搞活動屢受天氣影響
今次曼聯對傑志足球賽未揭幕，就率先揭開香港大球場滿目瘡痍嘅一面，亦都向世界各地「宣傳」大球場管理不善，相信由盛事變成醜事都並非盛事基金所願。不過，睇番盛事基金嘅往績，原來出乎意料嘅事屢見不鮮。基金○九年成立，作為佢哋首輪贊助活動之一嘅梅窩水燈節，當年舉行國際搖櫓比賽同放孔明燈，但因為潮汐漲退問題，比賽只能遲開早收。
不過，最令人嘩然嘅都係盞孔明燈，大會原本打算將四十呎高嘅孔明燈升上天空，仲雄心壯志想諗住打破世界紀錄，點知喺點火時燈頂裂開，差啲搞到火燭收場。而前年一月原定喺香港舉行嘅帆船賽，就因為負責籌辦賽事嘅單位更改國際賽安排，盛事基金明明決定贊助，但賽事都要擱置，香港市民最後都無緣觀賞呢場帆船賽。
每年農曆新年都有好多市民去林村許願樹許個新春願望，盛事基金就睇準呢個傳統特色，年前開始贊助林村許願節。有關團體為咗增添今年許願節嘅盛事氣氛，於是向盛事基金申請撥款打造一座十二米高嘅巨型風車，等市民許願祈福之餘仲可以轉個大運。點知有村民就嫌風車破壞風水，於是風車建成幾日就被迫拆卸，唔少市民都落空而回。
盛事基金肯贊助都建唔成風車後，上月贊助嘅香港龍舟嘉年華兼國際龍舟邀請賽就因為遇上熱帶氣旋「貝碧嘉」，搞到比賽一度因天氣惡劣而暫停。盛事基金搞嘅「盛事」可以話係鑊鑊新鮮鑊鑊甘，睇嚟下次再搞盛事真係要擇過日子拜過神先得喇。