中環出更：黃敏華又見肚 復出再延期
信和置業太子女黃敏華（Nikki）尋日腹大便便，出席旗下商場活動。佢容光煥發，着住黃色鬆身衫，個肚都好明顯，相信好快又做媽媽。今年三月，佢出席香港賽馬打吡大賽時話，做咗媽媽忙住湊Ｂ，停咗騎馬兩年，但佢自細就鍾情騎馬運動，想遲啲得閒就重拾興趣，點知轉頭又有咗，咁咪有排都無機會騎馬？
法總領事愛港多過老家
Nikki大肚又忙住湊仔，今次旗下商場搞「尋找巴黎」佢都抽空出席，可見佢對個活動好重視。佢話，法國藝術家用鏡頭影低多間巴黎老店門面，再利用仿真數碼印刷技術，將一間間巴黎老店搬來香港，連地下階磚同水渠蓋都跟足巴黎實景，非常原汁原味，仲有個迷你巴黎鐵塔，十足小巴黎。佢又話，負責設計嗰位藝術家前排嚟咗香港幾日，影低咗香港獨特一面，都會一併展出。
而當日同場嘅法國駐港澳總領事栢雅諾（Arnaud Barthelemy）激讚港版巴黎老店像真度高，但都不足以令佢思鄉，全因佢愛香港多過法國。佢笑言，法國都有值得大家遊覽嘅地方，首選當然係巴黎鐵塔，但喺巴黎市中心行吓，感受吓老巴黎氣氛，坐低飲杯咖啡，都好歎o架！