中環出更：喪反拍記者 貪曾做咗狗仔隊？
「貪曾」前特首曾蔭權爵士卸任後終日游手好閒，日前就被人影到佢去中山扮開會，佢已毫無角色，都唔知主辦單位搵佢去做乜，結果個個當佢透明發霉。唔知貪曾係咪悶得滯，尋日朝早佢如常到跑馬地聖瑪加利大堂望彌撒，但身上無喇喇帶咗部專業級單鏡反光相機，一直企喺門口守候，一見記者即舉機反拍，莫非佢想轉行做狗仔隊？
話說尋日早上八點鐘，記者抵達教堂時，見到黑晒面嘅貪曾企咗喺門口，頸上掛住一部大相機，佢一見到記者，即時舉機狂影，影到咁上下，可能見望彌撒時間到，於是急急轉身走入教堂。
匿柱後玩偷拍懶專業
十五分鐘後，貪曾步出教堂時，一反常態對記者窮追不捨，又鬼祟咁匿喺條柱後面玩偷拍，狂撳相機快門，仲扮晒專業咁款，影完橫度再影直度，愈影愈興奮，莫非佢受咗重大刺激？
貪曾反拍咗一陣，之後就同保鏢登上座駕返回半山住所，沿途多次想反拍記者。貪曾落車時仲急不及待舉機進行第三度反拍，仲刻意瞄準記者個樣，點知影影吓，發現座駕頂住咗後面嘅車輛，只好急急叫司機駛走座駕，自己同保鏢返回住所。記者上前向貪曾建議，叫佢下次換過支長鏡影相會好啲，點知貪曾居然笑笑口話：「我呢支定焦80（mm）嚟嘅，夠o架喇！」
睇嚟貪曾真係唔多識影相，佢嗰支鏡查實係85mm至真，兼且有1.4大光圈，係出名嘅人像鏡王，好似佢咁企喺冇雷公咁遠玩偷拍，冇200mm都唔夠啦！話時話，佢呢支鏡售價近一萬三千元，以佢咁孤寒嘅性格，點解會捨得買呢？莫非又係有人送畀佢嘅？
卓妮