立法會開始放暑假，正當議員計劃外遊歎世界，工黨就開始籌備九月底嘅台灣考察之旅。議員何秀蘭（Cyd）話，該黨正為台灣團設計行程，包括會拜訪當地民間團體同勞工組織，以及一啲專為同志服務嘅志願機構。
政府將喺立會休會後向工務小組重提擴建三個堆填區撥款申請，預計最早要明年初先可重上財務委員會申請撥款。
阿Cyd話，諗住趁今次台灣之行，順道考察當地廢物回收措施，研究點樣可以改善香港處理廢物情況。佢話考察團反應良好，暫時已經有成十幾個黨員報名，好快就可以正式確認行程訂機票。
成個暑假流流長，阿Cyd話原本諗住八月去意大利參加當地舉辦嘅兩至三星期意大利文暑期班，輕輕鬆鬆咁放番個悠長假期。佢話暑期班每周上足三十個鐘，包埋住宿同早餐都只係一萬元，可以話係抵到爛。不過，佢就發現來回香港同佛羅倫斯嘅機票要成一萬四千元，加上佢唔係好頂得順歐洲嘅炎熱天氣，所以最後都係留喺香港邊度都唔去喇。