政情：行會審查 陳智思：嚴過前朝
行政會議成員陳智思（Bernard）尋日接受劉慧卿網上電視台訪問，大談今屆政府對行政會議成員嘅利益申報有幾嚴謹，就連品格審查都要做埋，真係較前朝政府着緊好多，似乎係「有殺錯冇放過」。好彩佢大部分親戚都喺外國，冇咩涉及香港生意，否則都唔知點搵啲資料畀政府。既然政府審查得咁嚴，點解仲不時傳出官員漏報醜聞呢？
Bernard以自己為例，當行會傾到呢個議題時，連佢因為有間公司做物業投資，都要申報，秘書處亦因此而提醒佢，話呢間公司唔係完全冇機會收受到利益喎。而當特首每次傾到新議題時，都先要班成員利益申報，問清楚大家同有關議題有咩特別關係，同時喺討論中途，秘書處又會再確認大家係咪全部將利益申報妥當。
至於品格審查方面，Bernard就話上屆政府只係官員需要做品格審查，但今屆政府就要求唔單止行會成員要審查，就連直系親屬都審查埋，就以佢為例，當局做審查時會問佢班兄弟姊妹讀邊間大學，喺邊到畢業都要申報，佢當時第一個反應就係「點樣搵畀你呀？」所以話特首係「有殺錯冇放過」，原來係真嘅。