政情：中年無樓係廢人?
香港地少人多樓價貴，年輕人置業困難係鐵一般事實，好多上進青年努力儲錢都未必買得起樓。不過，向來語出驚人嘅上水鄉事委員會主席侯志強，就認定有樓在手先叫正常人，仲話如果人到中年四、五十歲仲未有物業，咁就叫做廢人。唔少網民聽到後都插爆佢，話呢啲說話只係連祠堂都可以賣嘅二世祖先至講得出，根本唔係「人話」喎！
其實侯志強早幾日已經亂咁噏，話一個人生活咗幾十年，如果冇任何利益衝突就係廢人，但當時就冇乜人理會佢，直到尋日佢出席立法會發展事務委員會特別會議時，佢無喇喇再將「廢人論」升級至買樓層次，總之界定所有買唔到樓嘅四十歲或以上人士都列為廢人。
議員感冒犯 促即時裁決
此話一出，即刻觸動到唔少泛民主派議員神經，議員陳偉業覺得侯志強出言冒犯議員，梗係要道歉啦！點知侯志強當正自己喺鄉議局開會咁，議員講一句佢就駁一句，議員涂謹申鬧佢貶低無樓人士，佢就話自己嘅言論係鼓勵年輕人發憤圖強喎。最後工黨副主席張超雄出招，話自己既係五十歲以上，亦冇物業在手，質疑侯志強擺明冒犯佢，所以要委員會主席謝偉銓即時裁決。
張超雄出動到苦肉計對號入座，謝偉銓惟有提出休會五分鐘同法律顧問研究。點知呢個時候侯志強仲唔收口，仲寸嘴話：「你告我囉，我講咗就唔會收番！」又話如果議員鍾意辯論，第日佢做咗立法會議員後大把機會，叫其他議員唔使心急。不過，最後謝偉銓都放生侯志強，無趕走佢亦無叫佢收回，只係叫大家發言時留意用語。
身為原居民 大講風涼話
侯志強「廢人論」一出，好多網民都批評侯志強身為原居民，就算唔係含住金鎖匙出世，都同含住塊地出世，寸爆侯志強根本唔使做嘢，一世人印印腳就有樓收租，當然可以講風涼話啦！亦有網民建議，如果佢真係咁叻，應該叫啲仔女主動放棄丁權，睇下班仔女係咪廢人喎！其實冇樓揸手可以有好多原因，有人鍾意揸現金、揸外幣、儲黃金，甚至買股票都可以，咁呢啲又係咪廢人呢？