政情：龐愛蘭為貓屎咖啡平反
身價不菲、風味獨特嘅野生麝貓（貓屎）咖啡，風靡萬千咖啡迷，但有環保團體指出，採集呢種咖啡豆嘅過程好唔人道，反對人們繼續品嘗。近期愛上貓屎咖啡嘅沙田區議員龐愛蘭（Scarlett），日前就聯同咖啡達人黃冠樺（咖啡黃）為此大平反，話野生貓屎咖啡絕對環保，仲係廢物利用添，唔人道嘅只係人工養殖嘅麝貓喎。
Scarlett話，從來對咖啡冇特別興趣，直至遇上咖啡黃，畀佢品嘗第一口野生貓屎咖啡滋味後，即一試難忘。當日Scarlett拉埋醫學會副會長周伯展齊齊品嘗野生貓屎咖啡，咖啡黃就搵來佢嘅得意門生麥Sir親自研磨及沖製咖啡，仲善用唔同產地咖啡嘅特性，炮製出一系列以咖啡入饌嘅佳餚。
黃冠樺賣書收益助研癌症
咖啡黃自年前發現患癌，一直與死神搏鬥，樂觀面對人生，從無間斷向社會推廣咖啡文化。今年初佢出版一本有關咖啡嘅書籍，分享品啡心得，並將賣出書籍嘅收益捐畀亞洲癌症研究基金會。下月於灣仔會展舉行嘅年度美食展，咖啡黃同麥Sir仲會喺展覽中示範即場炒咖啡豆，Scarlett話到時會落場炒埋一份喎。