政情:楊哲安父女 商場難捨難離

前教育局政治助理楊哲安(Jeremy)自從棄官從商,於獵頭公司擔任執行董事搵真銀後,相信都幾忙吓,點解?事關卓妮尋日見到其外籍工人湊住佢兩個寶貝女Lucy同Lily,去中環太子大廈商場同佢小敍。期間三父女齊齊睇雨景,臨別時Jeremy仲踎低身擁抱囡囡,見愛女依依不捨,再來個深情吻別,溫馨到暈。

尋日大約下午近兩點鐘,當時落住大雨,Jeremy同四歲半嘅大女Lucy及三歲嘅細女Lily齊齊現身中環太子大廈商場,佢兩個囡穿着連身裙及水靴,勁精靈可愛。

攬實兩囡吻別勁溫情

一向對囡囡呵護備至嘅Jeremy,左右手各拖實愛女,往歷山大廈方向前行,似係食完晏後散步。當佢哋走到兩座大廈之間嘅天橋時,Jeremy忽然停下腳步,同囡囡一齊欣賞落地玻璃窗外嘅雨景。

開心嘅時光過得好快,Jeremy隨即要返回歷山大廈辦公室,幾唔捨得都同兩個愛女講再見,但兩位小公主好唔捨得爸爸,不停扭計。Jeremy望住寶貝女,心都融晒,於是蹲下並展開雙臂將愛女攬緊,再錫錫吻別。之後工人就帶Lucy同Lily離開,臨走前Lucy主動向爸爸送飛吻,Lily更「頭岳岳」咁仰望住爸爸,認真甜蜜。Jeremy話,兩愛女放緊暑假,咁啱太太張燊悅有工作要做,所以抽時間陪吓囡囡喎。

第一手消息請下載on.cc東方互動iPhone/iPad/Android/Windows Phone Apps