如果一間津貼學校變成一間直資學校，將會有乜嘢後果呢？學生最關心嘅後果當然係學費昂貴，窮爸爸窮媽媽未必能夠供書教學，仔仔女女冇辦法入讀優質津貼中學，透過讀書識字打造脫貧之路嘅機會銳減。所以咯喎，近日城中熱話之一正正係傳統名校轉直資嘅問題，反對聲音此起彼伏。
跑馬地傳統著名女校聖保祿中學向教育局申請轉直資，引起社會人士強烈反彈，有人甚至成立關注組發起連串抗爭行動添。可能因為反對聲音好大啩，教育局扑低咗呢一個申請。教育局話喎，聖保祿中學各持份者對轉直資仍未達成共識，加上校方未能證明具備足夠能力喺直資嘅模式之下提供優質教育，因此去信該校否決明年轉直資嘅申請。聖保祿係直資計劃推行二十年以來，第十二間申請被否決嘅學校。反對聖保祿中學轉直資關注組就話嘞，歡迎教育局否決申請，促請校方日後唔好再申請轉制。
至於另一間有意轉直資嘅聖士提反女子中學又係點嘅情況呢？關注組成員尋日去到立法會提出申訴，要求政府檢討直資制度，改善有關津貼學校嘅政策。根據關注組嘅講法，聖士提反師生投票嘅結果顯示，絕大部分反對學校轉為直資。
簡單咁講，好多人希望質素高嘅津貼學校繼續平民化，千祈唔好走上一條貴族化嘅黃金大道。就以聖士提反為例吖，學校當初成立嘅目的正正係扶助弱質女子，避免男尊女卑嘅舊式社會以「女子無才便是德」嘅歪理培養出盲字都唔識多個嘅黃花閨女，咁先至有專收女生讀書嘅校規。若然聖士提反貴族化，一貧如洗嘅窮家女失去入讀嘅機會，咁咪違反有教無類嘅辦學精神囉，豈不是同創校宗旨背道而馳！
所以計功夫茶話齋，直資制度確係有檢討嘅必要，否則香港嘅深層次矛盾只會愈演愈烈。你知啦，香港嘅貧富懸殊已經嚴重到民怨沸騰，人數過百萬嘅貧窮市民一聽到百物騰貴或者樓價飆升就火滾，佢哋唯一出人頭地嘅機會係讀書脫貧，若然貴到飛起嘅學費阻頭阻勢，窮人隨時造反都有之。
身為聖士提反校友嘅立法會議員葉劉淑儀話喎，辦學團體聖公會有高層向佢反映，校本條例實施之後學校資源被攤薄，如果轉唔成直資爭取更多資源，學校未必能夠收到足夠嘅第一組別學生，咁就可能要開辦中文班。
若然葉劉所言屬實，咁就唔止要檢討直資制度，簡直要檢討成個教育制度啦。喂，傳統名校竟然因為資源被攤薄而搞到成績下降，教育局局長吳克儉第一個要自我檢討！