至今仍將「公信第一」字樣印於報頭的《明報》，近期被網民質疑自聲「公信第一」是否已牴觸剛剛生效的商品說明修訂條例。
商務及經濟發展局局長蘇錦樑尋日就本港3G頻譜政策與傳媒茶敍後，明報記者向佢請教，《明報》自稱公信第一，有無問題，結果自招揶揄，蘇錦樑反問佢：「你有冇數據證明？信譽的定義係乜嘢？」
呢位記者同局長講，《明報》呢項聲稱是來自中文大學三年前嘅報告。蘇錦樑聽罷就寸爆咁話，「你可以話三年前最有公信力囉！」但呢位記者似乎唔多滿意，仲追問「咁係唔係要加番註明呢？」局長自然亦無佢咁好氣，惟有以一句「哈哈」來回應佢！
《明報》自稱「公信第一」有否違例，近期備受網民討論，而呢項聲稱係來自中大新聞與傳播學院喺九七、○一、○六、○九及一○年嘅調查。消費者委員會早前已指出，若廣告聲稱係來自不全面、另類及過時嘅資料，有可能涉及不良營商手法，牴觸修訂後的商品說明條例。如果係咁，三年前嘅調查結果，過晒時啦！