政情：扮開會冇人理 貪曾又獻世
「貪曾」前特首曾蔭權爵士卸任後無所事事，但就經常畀市民影到佢勞師動眾咁去遊山玩水。唔知佢最近係咪得閒得滯，尋日就去咗中山出席喺中山市孫中山紀念堂舉行嘅「第二屆海峽兩岸中山論壇」開幕禮。個論壇其中重要一環係畀台灣有關嘅行業協會、同港澳有關單位與中山市翠亨新區就合作意向簽訂協議，貪曾呢位過氣特首已經毫無代表性，相信簽協議同佢冇咩關係，加上佢已成過街老鼠，所以會上都冇乜人睬佢，唔知佢走去扮開會做乜呢？真係獻世！
既然貪曾扮開會無所事事，唔知佢有冇發白日夢掛住遠在香港前特首辦嘅茅台酒珍藏呢？抑或思念「深圳禮賓府」個按摩浴池呢？但以上種種，貪曾都只係得個睇字。不過，貪曾向來都係度叔，樣樣算到盡，點解今次唔關佢事都去扮開會呢？睇真啲原來個論壇係包埋參觀孫中山故居同翠亨新區，仲有得觀賞由中山市創作嘅大型交響組歌《孫中山》，被傳喺香港睇開霸王戲嘅貪曾，唔怪得今次要上去扮開會喇！