政情：粉嶺高球場 入會費企硬
新界東北發展計劃正捲入政治風暴，之前又有立法會議員同關注團體要求港府收回粉嶺高爾夫球場作發展用途，而政府亦表明只要一年通知期就可以收番高球場笪地，所以多名富豪接連發功要求保留粉嶺高球場。雖然面對政治氣候風雨飄搖，但據聞粉嶺高球場會籍價格依然企硬鐵價不二，個人會籍依舊要十多萬元，公司會籍亦要五、六百萬元，有人仲提早為子女排隊等入會添！
打高球一向非平民玩意，打得波嘅都非富則貴。有擁有粉嶺高球場會籍嘅商界中人爆料，佢早於八十年代末購入高球場會籍，當年入會係要一萬元，想當年嘅一萬元唔係細數目，甚有身份象徵嘅意味。事隔二十多年後，粉嶺高球場突然進入議員和關注團體嘅眼球，甚至有人要求收回高球場取代新界東北發展計劃，究竟呢個狀況對於粉嶺高球場會籍價錢有咩變化呢？答案係冇乜大改變。
球會已講明當局有權收地
綜合各方消息話，粉嶺高球場個人會籍要十多萬元，同廿多年前一萬元相比升價十倍，至於公司會籍方面價錢認真「海鮮價」，據聞最高峰時期有某大財團以一千三百多萬元購入，依家高峰過後價錢有所回落，但亦要五至六百萬元，價錢仍然企得好硬。據聞高球會仲向欲入會嘅富豪講明，政府有權收回高球場土地，但啲富豪依然入會，對球會投下信心一票，莫非啲富豪睇死港府唔敢收回土地？
據聞有商界人士仲索性未雨綢繆，為下一代子女排定隊入會，有人笑言以前輪會籍要十幾年時間，或者下一代要輪廿幾年都唔出奇，所以依家排定隊都得喇。不過，亦有商界人士擔心，港府終有一日會敵不過強大民意壓力要收回粉嶺高球場，揚言一旦港府決定收回就要上街表達不滿，又警告有公司總部或因為無具規模嘅高球場想撤離香港都唔定。不過話時話，如果香港有錢賺嘅話，啲大企業會否因為區區一個高球場而撤資呢？