中環出更：李德麟冧莊 誓凝聚浙江幫

人才濟濟 政商齊賀

浙江幫人才濟濟，當晚現身嘅有外號「撈底王」嘅李德麟爸爸李和聲、聲寶－樂聲（香港）創辦人李達三、「船王」包玉剛長女包陪慶、「世界毛紡大王」曹光彪長子曹其鏞等人，仲有秘書長楊麟振、前全國政協副主席安子介孻孫安宇昭夫婦及青委主席麥超傑等人，而李德麟嘅女兒李惟琤及兒子李惟宏亦有到場。

卓妮見到身兼浙聯會常務副會長嘅全國青聯副主席陳仲尼（Rock），阿Rock掩不住喜悅話，太太區海倫陪就讀拔萃男書院附屬小學嘅囝囝到英國參加合唱團比賽，結果傳回捷報，佢哋取得兒童初級合唱組冠軍。阿Rock笑稱，囝囝識唱歌唔關佢事，係得到太太嘅好遺傳喎！

「金王」李德麟（左）及楊麟振（右）攜手搞好浙聯會，李和聲（中）鼎力支持。

浙江幫新生代輩出，包括安宇昭（右一）及太太金志芬（右二），仲有李惟琤（左二）及李惟宏（左一）兩姊弟。（徐家浩攝）

協成行董事總經理方文雄（David）亦有到賀，事關佢同李德麟都係中華總商會副會長。協成行擁有大量收租物業，近年租金暴漲，協成行進帳不少。David話，最近集團同藝術發展局合作，撥出旗下位於黃竹坑約一萬呎工廈，以低租供青年藝術家實現理想。

卓妮