俗語話，家有一老如有一寶。道理好簡單啫，老人家對社會貢獻良多，人生經驗豐富，理應受到重視及尊敬。可惜喺涼薄嘅港產官僚眼中，老人家唔係寶而係草，港府完全冇敬老之心，搞到安老政策甩甩漏漏，天殘地缺，連專為長者而設嘅醫療券計劃亦問題多多，投訴不斷，幾乎好事變壞事。
功夫茶唔係亂噏o架。長者醫療券計劃已推出三年幾，原意係資助長者睇私家醫生，免受公立醫院輪候之苦，本來都算係好事嘅。點知幾年落嚟，唔少原本參加醫療券計劃嘅醫生打退堂鼓，截至今年五月，只剩三千七百幾家診所參加計劃，比起最初足足少咗一成。例如較多長者居住嘅黃大仙及深水埗區，分別得番七十八間及九十一間診所參加，有長者表示，睇開嘅醫生冇參加計劃，醫療券得物無所用，根本係嘥氣。
點解會搞成咁？咪就係因為港產官僚添煩添亂，好心做壞事囉。呢，衞生署好做唔做，竟要求參加計劃嘅醫療機構全面數碼化，由申請到使用醫療券，以至病歷資料登記等，統統要用電腦操作，署方仲會定期派人到診所抽查病人資料，搞到診所不勝其煩，連香港醫學會前會長蔡堅都頂唔順，索性退出醫療券計劃。正如有團體話齋，醫療券本為長者服務，衞生署要求全部數碼化，實屬本末倒置。
係人都知，好多西醫習慣手寫病歷，仲要好似寫狂草書法咁，要求佢哋一時三刻轉晒數碼化，而且涉及咁多病人，根本係強人所難。最離譜嘅係，衞生署玩殘醫生，跟住又為難長者。呢，有老人家投訴，醫療券每張面值五十元，就算診金係一百九十九元，都只可使用三張，因為當局規定每張醫療券嘅面值都必須用盡。你話嘞，醫療券計劃限制多多，當局究竟想敬老定係想虐老？
講開又講，港府口惠實不至，安老政策又點只咁多問題吖。好似長者生活津貼咁，本應不分彼此，人人有份，但當局偏偏引入資產審查，搞到唔湯唔水，好多長者得個恨字。最不可思議就係安老宿位長期供不應求，年年都有幾千名長者等到死都入唔到安老院，而就算死咗都未必有骨灰龕。今時今日，生亦難，死亦難，簡直係香港嘅恥辱！
無計喇，港產官僚無能兼涼薄，所謂老有所依，老有所養，統統係廢話。嗱，人在做，天在看，咪話功夫茶唔提醒，每個人都有年老嘅一日，港產官僚再係咁涼薄，小心自己臨老唔過得世呀！