扣爆晒分 「改進」無用
王賜豪今年三月先喺九龍城法院打甩不小心駕駛罪，點知原來佢喺前年十月至上年十一月嘅一年多內，已經因為四次超速駕駛同埋一次違例衝燈，畀運輸署扣咗十九分，雖然佢上年八月自己報名參加咗個駕駛改進課程，希望補番三分「應急」，但係最後所扣嘅總分都係超過咗法定嘅十五分，無可避免畀運輸署下令停牌。
法庭原本上個月初已經傳召過王賜豪，但當時佢搵咗公司代表到庭，解釋佢因病入院而缺席，更遞上醫生證明畀裁判官睇，要求將案押後，所以法庭將佢單案排到尋日，結果佢都係唔能夠親身到庭。
控方尋日踢爆，原來王賜豪喺○三同○九年都先後有過停牌紀錄，所以今次已經係第三次停牌。