政情：自稱烈女 袁彌明激得起
袁彌明（Erica）近日當選人民力量主席，人力出名激進，有人就質疑港姐出身嘅Erica會唔會同人力格格不入。點知Erica就話自己其實係烈女，同人力好配合咁話。不過始終作為女性，佢都希望由佢出任人力主席可以令人力「喺剛烈之中帶番一絲柔性」，吸引多啲平時對政治唔敏感嘅OL（辦公室女郎）、中產及年輕主婦喎。
絕食瞓街驚蚊同癡漢
港姐通常都畀人斯文、優雅嘅感覺，同人力呢類激進組織可以話大纜都扯唔埋，不過Erica當選人力主席就證明世事係無絕對嘅。Erica仲話自己由始至終都係咁激，對政改原則揸得好緊，「你覺得我斯文，好多人都覺得我好激，未必去到遊行示威衝擊嗰種激，但整體畀人嘅印象都係烈女！」
Erica後日就會去中環遮打花園絕食，爭取普選，佢自言絕食當減肥，至怕係瞓街時吸引咗啲蚊同癡漢。