政情：新界人訪京伸冤
政府推出嘅擴建將軍澳、屯門、打鼓嶺三個堆填區計劃最後都觸礁收場，不過政務司司長林鄭月娥同環境局局長黃錦星都聲言會捲土重來。屏山鄉事委員會主席曾樹和同埋立法會議員梁志祥就同三十幾個新界人浩浩蕩蕩上京，向港澳辦副主任周波伸冤，話政府淨係喺屯門、打鼓嶺起堆填區嘅話對佢哋係唔公平，又話政府將新界嘅土地納入郊野公園，理應賠償畀新界人咁話，總之係將各式各樣嘅怨氣，帶晒上北京。
曾樹和梁志祥帶隊
曾樹和今次喺梁志祥陪同下帶隊去北京，隨團嘅係一班新界西北鄉村及市區嘅居民代表，包括元朗嘅村代表、梅窩同東涌嘅鄉事委員會主席、同埋葵青區嘅地區人士等，而負責接見佢哋嘅就係周波嘞。
身為今次訪京團團長嘅曾樹和尋日見完周波後匯報情況，佢就話今次唔係告御狀，各個村代表主要都係向周波反映對擴建堆填區嘅意見啫。佢認為，如果只係擴建屯門同打鼓嶺堆填區嘅話，並唔足以容納本港嘅垃圾量，應該進一步研究點樣擴建埋將軍澳堆填區。而社會上淨係要求擱置擴建將軍澳堆填區，對屯門同打鼓嶺堆填區附近嘅居民嚟講並唔公平咁話。
我哋亦都問過梁志祥，佢就話其實今次除咗講堆填區外，亦有提到新界人嘅土地權益、賠償、僭建同普選議題。新界人覺得政府將佢哋嘅土地納入郊野公園範圍，令佢哋損失成二百億元，政府應該賠償，而唔係好似依家咁處處向新界人開刀。
周波籲談判釋分歧
各種各樣嘅地區性問題，中央當然不能喺咁多人面前指指點點，說三道四，因為港人治港，北京根本就唔應該評論。因此周波聽完之後，都係叫大家忍耐下，叫佢哋以談判嘅方式解決分歧，要配合政府施政。對於普選特首，梁志祥就引述周波話，選舉嘅方式同細節係要由港人嘅智慧同政府按人大嘅決定自行商定，不過大家就唔好為反對而反對，過分內耗會減低香港競爭力喎。簡單啲講，咪即係叫大家唔好搞咁多嘢，以和為貴囉。唔知新界人嘅怨氣，訪京呻完之後有無消到呢？