中環出更：余鵬春夫婦義賣名牌瞓晒身
樂施會屬下嘅樂施商店，尋日舉行旗艦活動「名牌義賣周」，近期由裕華國貨董事副總經理「升呢」做總經理嘅梅州聯會會長余鵬春，同太太徐菊霞（Ida）拍住拖嚟撐場，佢哋擔任活動嘉賓之餘，更親力親為打理店務。余鵬春喺店內外滿場飛極力推銷商品，Ida就企喺收銀機前做到冇停手，又親自下廚炮製咗幾味撚手印尼菜宴客，認真落力，唔講仲以為佢哋係店東。
余鵬春話，上半年好忙，上周終於有時間抖抖，兩夫婦即刻飛去澳洲探望在學嘅一對仔女，再去泰國陪愛妻出席一個瓷畫展。
佢透露，大仔修讀圖像設計，細女則攻讀法律，佢話好鼓勵兒女追尋自己興趣，從無強迫佢哋繼承家族生意。余鵬春話，最近有意進軍加拿大地產，事關佢多年前趁住移民潮，於當地購下唔少商舖，之後一直放租，直至最近先再收回發展。
戴德豐一家捐衫袋
四洲集團主席戴德豐都喺度，佢話係余鵬春介紹佢嚟呢度捐贈物資，今次都有捐出部分衣物。佢話，平時買衫嘅品味好廣泛，乜嘢牌子都會買。戴德豐嘅愛女戴凱欣活躍於社交界，經常要出外應酬，名牌靚衫靚袋自然唔少得。戴德豐話，已經游說咗太太同囡囡一齊捐出名牌義賣，做善事之餘又可響應環保。
該會顧問Anne Hodson話，呢間商店已經有三十六年歷史，每年單靠義賣名牌籌得嘅善款逾一百二十萬元，用作扶貧救災及機構發展。
佢話，商店回收物資都有一定要求，好似壞電器、舊毛公仔呢啲唔保證賣得出嘅物品，就唔會回收喇。
卓妮