「若要人不知，除非己莫為」，呢句至理名言最啱用嚟形容消防官僚。消防處管理不善，亂象叢生，醜聞長爆長有，本來已經夠羞家，點知咁都未算，處方高層居然向下屬發出「禁爆令」，明文禁止前線人員利用WhatsApp及互聯網爆料，企圖以一紙禁令堵住悠悠眾口。結果弄巧反拙，欲蓋彌彰，禁爆令極速曝光，成為消防官僚另一單大醜聞，你都咪話唔搞笑！
唔知大家點諗，功夫茶就覺得成件事既醜陋又荒謬。堂堂紀律部隊，其身不正搞到醜聞纏身不特止，仲要炮製白色恐怖，阻止家醜外揚，可見消防高官目無法紀，死不悔改，已經到咗無可救藥嘅地步。唔怪得有人話，消防官僚家陣最專注嘅工作唔係為市民救火，而係為自己嘅醜聞撲火，既然係咁，消防處不如改名叫「消滅異見處」吖，笨！
嗱，市民眼睛係雪亮嘅。「東方報業民意調查」顯示，對禁爆令呢種高壓手段，四成一受訪者質疑消防處想阻止醜聞外洩；兩成五狠批製造白色恐怖；兩成二直斥消防官僚無認真檢討過錯。至於連休班消防員亦要遵守禁令，否則遭紀律處分，三成三人認為威嚇前線只會適得其反；兩成九指會打擊士氣；一成九批評涉嫌侵犯個人私隱。
無錯嘞，紙係包唔住火嘅，消防處千瘡百孔醜聞多多，點冚都冚唔晒o架啦。呢，消防官僚呢頭發出禁爆令，嗰頭又接二連三爆醜聞嘞，唔係被踢爆「消防泵房」變「洗衣房」，就係被揭發消防宿舍走火通道變雜物房；唔係前消防一哥盧振雄假公濟私佔用消防總部會議預備室，就係現任消防一哥陳楚鑫知法犯法周街煲煙亂過馬路。消防高官不知反省，反而諉過於人，究竟知唔知醜？
事實再次證明，壓力愈大反彈愈大，消防處以高壓手段掩蓋醜聞等於引火自焚，同自殺無乜分別嘅咋。當然啦，消防處居心叵測滋擾傳媒，打壓新聞自由，同炮製白色恐怖嘅手法如出一轍，根本就係與民為敵，自掘墳墓！
正如上述民調顯示，三成五受訪者不滿消防高層打壓言論，認為無助改善管理；三成斥妨礙監察部門犯錯；兩成七指摘剝削公眾知情權。
一句講晒，消防處陰招遮醜，禁爆令愈冚愈臭。自古以來，箝制言論嘅暴君都無好下場，防民之口嘅周厲王淪為喪家之犬，焚書坑儒嘅秦朝二世而斬，唔知搞禁爆令嘅消防官僚又有乜下場呢？話時話，不如港府都向消防處下達禁爆令，唔係嚴禁爆料，而係嚴禁再爆醜聞，如果唔係，港產官僚遲早攬住一齊死嘅咋！