「佔領中環」行動發起人戴耀廷一連三日落書展，為佔中新書舉行簽名會，更揚言新書版稅全部撥捐佔中秘書處，出錢又出力。但原來佢嘅野心遠不止於此，尋日落場同讀者答問交流時就漏口風喇。
事緣有讀者質疑戴發起佔中，同時又成日強調自己唔係真係想佔中，究竟立場係點？戴耀廷解釋，佔中只係威逼中央妥協嘅手段，仲幻想一旦奇迹出現，中央喺港人佔中前先行「跪低」，開出港人接受的普選方案，佔中就有望成為textbook case（教科書事例）喇。唔通戴耀廷發起佔中又出書，搞場大龍鳳就係為咗博自己個名載入史冊？佢係咪搞佔中壓力太大，搞到自己都唔知自己講乜呀？
