人力呢排人事變動多，除咗袁彌明（Erica）當選主席外，當年同立法會議員陳志全（慢必）一齊成名嘅譚得志（快必），兩星期前亦順勢加入人力，睇怕快必同慢必可以再續未了緣，好似當年喺電台咁拍住上。
其實快必向來支持激進民主派，不時現身唔同活動撐同路人，但就好少講自己喺邊一個組織，尋日佢出席政改論壇時着起件搶鏡黃色衫，原來佢兩星期前已入咗人力，仲做埋執行委員。至於點解到最近先肯加入人力，快必就話因為有新主席袁彌明同新副主席嚴達明嘛，梗係要撐佢哋啦。
人力呢半年雖然有「教主」黃毓民離去，但亦有譚香文、快必等人加入，聽聞人力內部成員都覺得人力形象過分「老餅」，所以先選出Erica做主席，再加埋快必嘅加入，銳意大搞「去麻甩化」。
