立法會雖然經常出現激辯場面，但呢啲情況往往只係集中喺幾位議員身上，其他議員有時淨係識照住張紙嚟讀，讀足十幾分鐘都唔知自己讀緊乜。立法會主席曾鈺成平日開會時都要留心議員發言，相信佢就一定最清楚邊啲議員發言最「趕客」。
事關佢尋日出席海港青年商會舉辦嘅青年領袖選舉頒獎典禮，致詞時批評有啲議員發言時聲調呆板，內容又言之無物，一開口就已經搞到佢唔想聽。
曾鈺成話，自己成日坐喺會議廳內主席位上，可以居高臨下望到所有議員，又可以欣賞議員發言時嘅表現，暗中為佢哋逐一評分。佢話立法會六十九位議員來自不同社會階層，有唔同嘅政治背景之餘，社會都對佢哋有唔同評價。佢批評議員論政水平參差，有人讀嚟讀去都唔知自己讀緊啲乜，根本就唔可以說服其他議員，不過佢就點都唔肯講佢講緊嘅係邊個。
議員劉慧卿唔肯猜測曾鈺成批評緊邊啲議員，但就話佢都留意到部分議員有照稿讀嘅習慣，佢建議議員發言要由心而發，否則搞到其他人走晒，得番自己一個喺會議廳對住空氣講嘢就唔好啦。