政情：崔康常唔再搞「Ａ工廠」
帶領「狀元搖籃」恒生商學書院過渡至恒生管理學院嘅崔康常，上月底正式離任榮譽校長一職。崔校長經過半年時間醞釀，原來佢即將另起爐灶，計劃搞一間新自資院校，勢要圓私大夢。不過要開大學唔容易，估計最快都要幾年後至招生，嚟緊下年會先提供新高中課程，主打商科，十足恒商翻版。
獲善心人7位數打本
崔校長話四年前其實已有人搵佢搞自資院校，但當時仲幫緊恒商轉型做專上院校，直至半年前獲善心人捐贈七位數打本，佢隨即搵埋同樣已離開恒管嘅創校副校長區翠華一齊籌備，現時已獲辦學團體加拿大神召會借用石硤尾前嘉智學校空置校舍，仲向教育局註冊埋，叫宏恩書院（Gratia College）。
除咗註冊、搵校舍，要搞一間新專上院校真係談何容易，崔校長話最困難係集資，淨係要過課程評審閒閒哋都要一至兩億元先夠，希望有退休教授可義務幫手寫課程，喺轉虧為盈前自己都唔會出人工，真係少啲熱誠都難以成事。今個月成為正生書院校監嘅崔校長仲話，如果搞得成，一定會收正生學生。佢話無意照抄恒商，唔係要再搞「A工廠」。