政情：吳秋北倒米有病漚好佢
工聯會（工記）為慶祝再有一架新流動中醫服務小巴落地，尋日舉行啟動禮，工記嘅領導及立法會議員都有出席，當然每位都硬銷佢哋嘅中醫服務有幾掂，話工記嘅中醫每位都醫術精湛，且中藥又可治未病等。不過工記理事長吳秋北就直言自己好少睇醫生，有病就漚好佢，分明係幫工記倒米。
話煲藥麻煩兼唔好飲
尋日個個都硬銷中醫服務有幾掂。工記立法會議員麥美娟（Alice）話，中醫可用嚟調理，佢幾年前整傷隻腳之後，依家都不時會去工記嘅中醫診所針灸。黃國健（KK）就話，當佢遇到腸胃唔舒服或感冒時，就一定會睇中醫。
工記榮譽會長鄭耀棠話，中醫係固本培元，佢從來都只會睇工記嘅中醫。兩年前幫工記搵到贊助人捐出小巴嘅立法會議員黃定光（象哥）都話不時食中藥調理身體，象哥嘅太太兼工記會長林淑儀就話，象哥應該去幫襯佢哋中醫診所嘅管理體重計劃。
不過吳秋北一於少理，佢勁有性格咁話自己好少睇醫生，因為中藥又唔係特別好飲，要屋企人煲藥又麻煩，唔單止中醫少睇，佢連西醫都少睇喎。咁有病點算呀？佢話，瞓吓覺，漚好佢喎。