中環出更：陳維安與妻不丹慶瓷婚
立法會秘書長陳維安（Kenneth）上月中陪同主席曾鈺成出訪英國拜會國會議員，曾鈺成隨後趕返立法會主持每周例會，但Kenneth就順便請多一個禮拜假，同太太去不丹旅行過二人世界。Kenneth話六月中係佢同太太結婚二十周年嘅大日子，兩人早喺結婚時相約每五年都要飛去外地慶祝結婚周年，所以即使立法會當時仲未休會，佢都要履行承諾請幾日假。
大讚當地人好客友善
對上兩次慶祝結婚周年，陳生陳太都選擇去充滿浪漫情懷嘅法國酒莊飲紅酒，今年Kenneth就諗住搞搞新意思，同太太去不丹。不丹素有「喜馬拉雅山下香格里拉」嘅美譽，快樂指數冠絕全球，Kenneth大讚當地人好客友善，佢同太太到城內寺廟參觀時，更不時遇到僧人向佢哋報以微笑。不丹宗教氣氛濃厚，Kenneth對掛喺樹上嘅經幡特別感興趣，話不丹人相信如果有風吹起經幡，就等於唸過幡上嘅經文。
至於多年來點解只係去咗三次旅行而唔係四次，Kenneth解釋原本結婚五周年時都有諗過去旅行，不過當時太太啱啱懷有身孕，為免舟車勞頓影響腹中塊肉，兩人最終決定取消行程，留待下一個五年補番數。
卓妮