唔識開船又想御駕親征出海吹吹風，點做好呢？有辦法，原來海事處對於海上交通安全監管寬鬆到暈，市民毋須領取牌照都可以駕駛小型機動舢舨。亦即係話，舢舨充炮艇就話冇乜可能啫，舢舨充遊艇絕對綽綽有餘，情況就好比陸上無牌駕駛大膽車。
多得海事處麻痹大意發雞盲，舢舨租賃情況成行成市，將軍澳、汀九、屯門以及西貢等地都有得租，日租金額大概二百幾至三百多元，深受釣魚愛好者歡迎，一得閒就租隻艇仔出海自駕遊，好好享受滄海一聲笑嘅魚樂無窮。
之不過咁，自由自在駕駛小型機動舢舨出海雖然相當好玩，但係不可不知嘅係當中暗藏危機重重嘅奪命陷阱。過去三年喎，本港海域發生過最少四宗涉及機動舢舨嘅嚴重事故，淨係舊年已經有兩宗死亡慘劇。舊年六月有一名六十一歲男子同五十八歲妻子駕駛機動舢舨喺大嶼山欣澳海面垂釣，不幸遇上大風浪打沉舢舨，事後只有女事主獲救，男事主失蹤三日最終伏屍石灘。舊年十二月又有一名六十二歲男子海上自駕遊，駕駛機動舢舨喺北角對開海面垂釣，懷疑冇察覺鄰近躉船起錨，舢舨被錨鏈擊中翻沉，釣魚漢遇溺不治。
係人都知陸上駕駛機動交通工具嘅管制非常嚴格，就算係相對小兒科嘅電動單車，都要攞正牌先至准許一個人兩個轆穿梭往來，因乜解究海上駕駛機動交通工具竟然能夠無牌駕駛嘅呢？根據《商船（本地船隻）（證明書及牌照事宜）規例》，任何人士只要年滿十六歲，即可駕駛長度不多於三米及馬力不高於四匹嘅機動舢舨，毋須領有操作人合格證明書，並且可駕船到本港任何水域。海事處認為，呢一類舢舨係開敞式船隻，只能純粹作為遊樂用途，體積較小及引擎馬力有限，一般只可裝載兩人及近岸水域運作，所以不必特別訂定指定活動範圍，毋須要求駕駛者持有指定嘅合格證明書。
呢嗱嗱嗱，所以話海事處徹頭徹尾就係一個害人不淺嘅「害事處」，如果唔係南丫島海難都唔會造成三十九人死亡咁慘烈啦，雖然肇事船長難逃誤殺嫌疑，不過海事處嘅監管粗疏都係罪魁禍首。
計功夫茶話齋，好心海事處與時並進啦，實在有必要參考陸上交通安全法則，但凡機動船隻都要設立考牌制度，唔好任得小市民盲舂舂船毀人亡。唔好忘記喎，港產官僚最擅長就係移山填海，將本港海域填到窄一窄，小型機動舢舨好大機會同大型船隻狹路相逢，無牌駕駛人士容乜易手忙腳亂撞個人仰船翻o架！