政府各個決策局嘅常任秘書長可以話係公務員體制中嘅最高級別，薪金當然唔會少。不過，勞工及福利局常秘譚贛蘭唔止人工高，仲係咁多常秘之中，持有最多物業嘅一個。本月初被我哋影到涉嫌違泊政府車兼喺禁區上車嘅譚贛蘭，原來分別喺香港、倫敦同中山共持有七個物業，可以話係常秘中嘅「樓王」。
譚贛蘭喺今年六月初公務員投資及權益登記申報中，唔止喺香港港島區有一個自住、三個出租嘅物業，喺倫敦同中山亦都有屋住、有租收。譚贛蘭喺倫敦嘅兩個物業當中，其中一個仲報稱裝修緊，睇嚟係譚贛蘭嘅新「獵物」都唔奇。就咁睇，譚贛蘭呢位收租婆每月嘅收入都幾和味。
僅次於譚贛蘭嘅常秘就有公務員事務局嘅黃鴻超，佢亦都喺香港、新加坡同倫敦三地總共持有六個物業，而商務及經濟發展局工商及旅遊科嘅常秘黃灝玄亦不甘示弱，喺港島同倫敦都各持兩個物業。有人幾個物業揸手，亦有人「身家清白」，好似商經局通訊及科技科常秘何淑兒、政制及內地事務局常秘張琼瑤、食物及衞生局常秘（衞生）袁銘輝，以及海關關長張雲正都係報稱冇持有任何物業。