救火救人係消防處正業，但偏偏消防處不務正業，花費大量精力處理埋啲無根無據嘅投訴，尋日就有立法會議員質詢當局有關處理投訴嘅準則。不過，保安局就死撐話消防處難以判斷投訴人動機是否虛報，咁係咪意味以後一收到投訴，就算無根無據都派人上門調查呢？如果係咁就真係戥市民擔心，如果消防處嘅人力物力抽調晒去處理呢啲所謂嘅投訴，萬一遇上火警或重大事故，消防處係咪有足夠人力去應付呢？有乜人命傷亡，消防處係咪擔當得起呢？
