關愛基金去年推出項目，向居住環境惡劣、俗稱N無嘅低收入人士提供津貼，但項目就唔會資助工廈劏房戶。有立法會議員就建議，將工廈劏房戶納入基金援助範圍，但民政事務局局長曾德成就話，瞓街唔違法，可以透過基金派錢畀佢哋，但住工廈劏房係違法，所以唔可以獲得該項目資助。德成局長咁講，唔通係想叫啲工廈劏房戶去瞓街攞關愛基金資助？難怪被議員鬧佢涼薄喇！
田北辰（田二少）早前探過啲工廈劏房戶，佢尋日喺立法會質詢時同德成局長講，低收入人士住工廈劏房差唔多已經係瞓街前嘅最後一着，事關畀得起多一蚊租都唔會住啲咁惡劣嘅地方，問德成局長點樣幫啲工廈劏房戶。點知德成局長就話，工廈劏房唔係合法居所，政府要取締工廈劏房，如果資助工廈劏房戶可能變相鼓勵啲人住工廈劏房。不過，因為瞓街唔違法，因此可透過關愛基金派錢畀瞓街嘅人。
田二少聽完就批評德成局長嘅回覆不可接受︰「咁即係瞓街仲有着數？慳番租金之餘仲有政府畀錢，住劏房好似仲戇居！」議員陳家洛就直斥德成局長好涼薄，完全唔理民間疾苦，「政府係咪叫人瞓街？係咪咁先會施捨一千幾百？」議員張國柱仲話，叫局長去住吓劏房，睇吓係咪仲咁答。