政情：慢必捐血 食紅會檸檬

尋日立法會大會開始冇耐，身穿西裝、打粉紅色呔嘅慢必步入捐血站話想捐血，紅十字會職員叫佢先填有三十條問題嘅問卷，當中第廿三條就問及個人性生活習慣，包括「有否與感染愛滋病病毒的人發生性行為？」、「有否接受金錢與人發生性行為？」等問題，最後一條就係問：「如果你是男性，有否曾經與另一名男性發生性行為？」

慢必睇完問題後諗咗一陣，之後就好誠實咁喺「是」嗰一欄打咗個剔號。過咗幾分鐘，紅十字會職員話慢必屬於高風險一族，拒絕接受佢嘅捐血要求。慢必即時要求職員打電話向紅十字會醫生查詢，醫生回覆話按照既定程序，如果男性曾與同性發生性行為，就唔符合捐血資格，又話該會正檢討有關程序，但在此之前都會拒絕同類人士捐血。

慢必聽到結果後顯得有啲悶悶不樂，話唔安全性行為同濫交先會容易感染愛滋病，覺得同性戀者唔應被相提並論。佢話細個讀書時都有捐過血，佢原本都有諗過講大話呃紅十字會，訛稱自己未試過與同性性交，但最後都係唔想呃人，所以先會如實向紅十字會提供資料。

盼盡快檢討放寬要求

慢必講得愈多就愈失望，話有唔少外國國家已經唔再將同性戀者視為高風險，加拿大更加會為同性戀者設定捐血時限，希望紅十字會可以盡快檢討放寬要求，以免令同性戀者覺得受歧視喎。不過，紅十字會單靠捐血人自願性申報個人情況根本唔可靠，如果捐血人隱瞞與同性或感染愛滋病病毒嘅人發生性行為又點呢？相信最後都係要靠血液檢驗。

65議員參與 僅８人成功

不過，尋日冇得捐血嘅並唔係得慢必一個，漁農界何俊賢同法律界郭榮鏗就因為曾喺九四至九五年瘋牛症肆虐期間喺英國居住，血液樣本唔符合世衞標準而被拒捐血。歷時七小時嘅立法會捐血活動一共有六十五人參與，當中成功捐血嘅議員只得八個。