中環出更：東華換屆中學設宴 「珍」有心思
各大慈善團體早前順利換屆，陸續舉行傳媒聚會，尋日輪到東華三院。主席陳婉珍（Ina）好有心思，破天荒喺東華三院黃笏南中學設宴，將學校變身成為別開生面嘅簡約飯堂，並搵來旗下社會企業iBakery廚師，炮製精緻美味又輕巧嘅西餐，繼續貫徹其「惜食」宗旨。
東華三院旗下有唔少教育機構，位於九龍塘嘅黃笏南中學，係該院史上首間創辦嘅中學。呢間逾五十年嘅校舍，日前獲政府撥款二億多元重建，於下月展開工程。Ina於是靈機一觸，乘機帶大家一齊告別舊校舍，佢話校園嘅重建，標誌着東華教育史上嘅里程碑。今年中學文憑試，該校有五位學生考獲六科五*或以上佳績，約八成半學生達到入讀大學資格。
親自設計領呔 總理受落
卓妮同場仲見到總理王賢誌、黃業光及區宇凡，佢哋不約而同打咗條桃紅色嘅領呔，呔上有整齊排列嘅粉紅色心形圖案，非常搶眼。原來領呔係由Ina親自設計，用上佢至愛嘅桃紅色，心形則代表東華人無限愛心。
Ina仲另外設計咗兩款藍色呔，點知大家都特別鍾情紅色呔，仲話每逢與官員會面，都必以紅呔上陣喎。
講到東華今年試辦嘅天水圍天秀墟生意一般，Ina話，其實入面都有成功賺錢嘅例子，但唔少商戶欠缺營商經驗，未來會諗計增加墟市吸引力，例如周末舉辦嘉年華及表演，並引入不同類型商品，有信心墟市會愈辦愈好。
卓妮