都話香港愈來愈中國化㗎啦，警察似公安，消防似東廠，真係唔講得笑。呢嗱嗱嗱，消防東廠又出動喇，處方高層居然向下屬發出「血滴子禁制令」，明文禁止前線人員利用WhatsApp及互聯網爆料，包括「對任何人士帶有不善意的批評」，不可損害部門聲譽，甚至連休班期間都要遵守呢一個噤若寒蟬嘅獨裁規定，違令者會被紀律處分咁話喎。
因乜事幹消防處要好似內地維穩人員咁樣製造白色恐怖呢？聽講喎，今次消防處高層禁止下屬爆料，同本報早前踢爆消防處過去一年對八十六名人員採取紀律處分有關，事件之中有一名消防人員休班期間於網上動用粗穢及冒犯性字眼而被嚴厲譴責，前線人員相信係管理層因應呢一項處分而發出禁制令。簡單咁講，消防處被東方報業集團接連踢爆多宗醜聞，凸顯呢一個紀律部隊毫無紀律可言，管理上出現嚴重問題，處方高層唔識得吾日三省吾身，繼而檢討整頓，反而賴天賴地賴得就賴，歸咎內鬼爆料導致家醜外揚，所以為咗遮醜就製造白色恐怖嘞。
之不過咁，功夫茶想問一問港式東廠，家陣係乜嘢時代呀？係恐龍時代定係石器時代呀？以前冇互聯網就話要好似朱元璋咁落後，利用月餅包住字條傳遞揭竿起義嘅作反訊息啫，今時唔同往日㗎喇喎，前線人員恨鐵不成鋼，揭發消防處家醜簡直不費吹灰之力啦。即係咁，呢一個企圖規管消防人員使用WhatsApp爆料嘅禁制令一出，馬上成為WhatsApp群組之間瘋狂傳播嘅訊息，連身為外人嘅記者都收到，你話係幾咁滑稽兼諷刺吖！
正如城市大學專業進修學院學術統籌宋立功話齋，最近消防處問題多多，例如輕率闖入東方報業中心巡查伺服器房間，嚴重侵犯新聞自由，可見消防處高層管理不善，既然上樑不正，自然下屬投訴。
講到呢度，功夫茶諗起幾句好老套但係又好正確嘅老生常談：欲要人不知，除非己莫為；好事不出門，醜事傳千里。喂，一個人唔出醜就唔會有醜聞，咁就唔怕有人唱通街啦。舉個例子吖，若然消防處唔係烏龍百出買錯裝備，又點會怕有人踢爆佢哋浪費公帑呢？
計功夫茶話齋，今時今日箝制前線員工嘅言論自由絕對行唔通，你想話遏止家醜外揚咩，偏偏呢一種專制行為已經係難睇到極嘅家醜之一，唔使一陣間已經揚到街知巷聞。消防東廠如果唔想醜上加醜，正正經經做好分內事先啦，唔該！