政情：李焯芬林筱魯唱雙簧
西九文化區超支風波備受關注，同為西九管理局董事局成員嘅古物諮詢委員會主席林筱魯同香港大學專業進修學院院長李焯芬，早前聯袂出席一個活動時，異口同聲為西九超支辯解。
本身係專業地質工程師及水利專家嘅李焯芬話，讀工科出身嘅人都明白大型工程超支並唔出奇，仲話自己參與過一個規模大過西九嘅工程，由最初預算八百億元，到埋單計數時要二千億元。乜嘢工程咁宏偉？咪三峽工程囉！
唐英年當年保證不超支
李焯芬曾參與多個核電站、大壩及基礎設施建設，當中包括著名嘅三峽工程，仲因此被喻為「大禹傳人」。佢話，但凡工程未有具體嘅設計圖則之前，預算都只係粗略估算，未能作準，超支係好平常嘅事。身為城市規劃師嘅林筱魯好認同，猛話呢個事實好重要，一定要畀市民知喎。
道理大家都明，只不過當年嘅政務司司長唐英年為咗氹大家落疊，信誓旦旦保證西九唔會超支，但點解當時冇人提醒佢呢？