政情：借G4過橋 貪曾睇 霸王戲
「貪曾」前特首曾蔭權爵士以縮骨貪着數聞名，佢在任時除咗瘋狂外訪遊山玩水，更經常恃住自己係特首而公器私用攞着數，要求升級飛機位同酒店房間等。俗語話「江山易改、本性難移」，貪曾卸任後仍難改貪威識食嘅劣根性，有人指佢借用「前特首」名銜繼續呃飲呃食，就連睇戲嗰一百幾十元都慳，有傳佢借身邊嘅G4（保護要人組）過橋，以保安為由逼戲院請佢睇霸王戲。
貪曾在任時經常以公帑外訪，唔止要求航空公司將佢嘅機位升級至頭等機位，仲要求當地酒店將佢嘅客房提升至超豪華總統套房，就連審計署都怒轟佢做法不當，真係使到盡、貪到盡。不過，原來佢卸任後亦都唔放過任何攞着數嘅機會，有爆料人就話，貪曾連一百幾十元嘅戲飛都唔放過，話說每當佢想出街睇戲時，就會叫前特首辦公室安排G4畀佢，仲吩咐G4一定要打去戲院通知一聲。
專揀超豪戲院佔便宜
咪以為貪曾有自知之明，知道自己已淪為過街老鼠，所以要作特別保安安排，查實佢只係想叫人話畀戲院聽佢要去睇戲，等戲院準備定個靚位。戲院都係打開門做生意，為免麻煩惟有中門大開，安排佢呢位過氣特首睇霸王戲。據聞貪曾仲對位於西九龍一間超豪戲院情有獨鍾，呢間戲院除咗座位特別寬敞，仲具有錄音室水準嘅音響系統，所以貪曾唔豪唔揀，認真識貪，仲要一啲都唔避忌。
前特首辦竟不作評論
我哋就有關爆料向前特首辦查詢，包括問貪曾卸任後有冇試過獲戲院免費安排睇戲、前特首辦有否為此作過保安安排等。不過，前特首辦就回覆，話貪曾已經卸下公職一年多，對於佢嘅正常私人活動將不會再作出評論。必須強調，政府G4係由公帑支薪，如果貪曾真係要求G4幫佢做埋啲貪小便宜嘅行為，納稅人嘅血汗錢豈不是使得好冤枉？而前特首辦係專責處理涉及「前特首」嘅事務，試問點可以唔正面回覆關於「前特首」嘅提問呢？莫非呢個又係貪曾嘅旨意？