北河街遍鼠蹤食署竟話「輕微」

「晚晚行過都聽到吱吱聲，有晚經過仲有隻老鼠撲出嚟，真係嚇死人！」陸女士指北河街一帶衞生惡劣，不時發現有店舖職員收舖時直接將舖內垃圾掃出行人路及「坑渠」，令排檔底罅隙積藏大量垃圾，「啲排檔密密麻麻已經好容易畀老鼠匿埋，衞生咁差，冇老鼠先奇啦！」

晚上群出覓食 無懼行人

另一居民黃太亦說，曾多次目擊豬肉檔檔主將肉碎隨手撒於行人路，卻鮮見食環署職員巡查及執法，質疑當局「養鼠為患」，「隨街丟舊紙巾都要罰錢啦，點解啲舖頭晚晚丟啲食物出街都冇人捉？」黃太坦言不滿食環署無視街道衞生。

記者曾於晚上九時許實地了解，發現店舖多已打烊，行人路則擺放大量發泡膠箱、膠袋及食物碎屑。記者巡視未幾，即見鼠隻從渠口爬出並迅速竄入排檔底，利用相連的排檔作掩護，以便在排檔底穿梭覓食。部分排檔則以木板或紙皮將渠口封閉，以免為鼠隻提供覓食通道。

食物環境衞生署發言人承認，過去一年接獲約五百四十宗有關區內鼠患投訴，並向亂拋垃圾者發出八十九張定額罰款通知書，強調接獲本報轉介後即時派員巡查，發現輕微鼠蹤，已施放鼠餌及進行控鼠工作。發言人強調，除日間清掃外，每晚亦安排潔淨服務承辦商在攤檔營業時間結束後清掃。

年投訴540宗 未獲正視

「好明顯每日清潔、定期滅鼠都冇用，食環署應該大力推動排檔區清潔，靠政府宣傳同呼籲檔販配合，定期徹底、深入咁清潔，要預防同治療雙管齊下！」當區區議員劉佩玉指上址一帶鼠患嚴重，反映食環署恆常清潔並未到位，未能改善當區衞生情況，建議當局大力推動「排檔區清潔日」，改善衞生及控制鼠患。

立法會食物安全及環境衞生事務委員會委員王國興則認為，事實反映食環署處理鼠患不力，「有成五百幾宗投訴，如果食環署咁都只係話輕微，絕對係輕視咗！」王建議當局應主動監察及採取多管齊下方式進行大規模滅鼠行動，避免情況惡化。

記者：黃芷君／攝影：阮佩君