政情2.0：廢腑之言：睇香港電視就有投票權？
前年區議會選舉爆出連串種票醜聞後，政府好小心處理選民登記問題，先後剔走約廿萬個「幽靈選民」。
點知立法會議員梁美芬尋日就喺立法會政制事務委員會上，質疑當局要求選民申報同公開地址嘅規定，原因係有啲選擇同居而唔肯結婚嘅市民，唔想畀人知自己住喺邊，所以寧願唔登記做選民。
佢又話依家有愈嚟愈多香港人退休後長住內地，但佢哋身份證上都有三粒星，又睇香港電視，點解因為喺香港無住址而唔可以登記做選民呢？
政府就重申，即使係永久性香港居民，亦必須證明同香港仲有聯繫，先可以登記成為選民，純粹有睇香港電視節目並唔算數。