今年七一遊行改喺中環遮打花園做終點，被指係為將來嘅「佔領中環」預演，至於由建制派組成嘅各界慶典委員會主辦嘅「手牽手，獻愛心」活動，就被指係為七一遊行打對台同為反佔中預演。不過有慶委會負責人就誓神劈願咁話，佢哋真係並非針對佔中，而係為咗「佔領十八區」，今次活動大搞家訪同「加強版蛇齋餅糉」，為未來幾場重要選舉拉定票。
慶委會負責人當日宣稱，「手牽手」活動喺全港一共有廿二萬五千人參與，但原來實際不止此數，因為慶委會趁呢次活動，動員咗過萬人到各區洗樓家訪，訪問過嘅家庭達到三、四萬個，以一個家庭兩至三人個成員計算，參與人數隨時多達三十萬。而且佢哋家訪時唔單止噓寒問暖咁單純，仲好實際咁帶咗大量禮物，包括米在內，完全係蛇齋餅糉嘅加強版。
慶委會事後形容今次活動非常成功，已諗定喺嚟緊嘅十．一慶祝活動搞多次，最多一年可以做足四次、派足四輪。不過話說回來，各泛民黨派亦喺七一遊行期間，喺遊行路線上狂設街站，大肆籌款，目的都係為咗將來選舉之用，大家殊途同歸，無話邊個啱邊個唔啱。