政情2.0：公民廣場：三科揸兜黃錦星羞家

中學會考高考改制成為文憑試後，考生最夢寐以求嘅再唔係攞A，而係「摘星」，因為文憑試最高分已經由A變咗做5*同埋5**，總之愈多「星」就愈威。可惜名稱有個「星」字嘅環境局局長黃錦星，早前向立法會申請撥款擴建將軍澳、屯門同打鼓嶺三個堆填區，最後都被迫撤回，連票都投唔到，攞足三科U（Unclassified），即係成績差到「未能評級」，認真羞家。喺爭議尾段瞓身幫黃錦星拉票嘅政務司司長林鄭月娥，早前對住班等緊放榜嘅考生時就自我安慰，強調考試「唔係一試定生死」，「輸一次可以再嚟過」。不過，地區人士對擴建三個堆填區嘅反對聲音咁大，黃錦星就算喺暑假後「重考」向立法會重提三項撥款，合格過關機會仍然唔樂觀。