「香港本土」成員新同盟立法會議員范國威（Gary）一向主張香港本位，但早前卻被本報揭發喺印製諷刺高官遊戲卡時，使用簡體字「双」字，事後佢死撐個「双」字係日本字而非簡體字。
尋日佢同其他「香港本土」成員又搞咗個記者會，批評特首梁振英（CY）等高官經常使用一啲內地用語，話要捍衞本土日常用語喎。咁唔知啲香港青年人，近年成日用「宅男」、「人氣」、「放題」同「激安」等日語代替廣東話，令東洋文化入侵本地文化，佢又會唔會關注呢？
香港高官大量使用內地用語，其實係源自「貪曾」前特首曾蔭權爵士，佢出名普通話水皮，但又最鍾意使用內地用語擦北大人鞋，例如「政策出台」、「優化」、「勢頭」、「重中之重」及「進步發展觀」等，都係喺貪曾年代引入，但Gary尋日喺記者會上，就一味批評成日講「方方面面」嘅CY，仲話去信廣管局表達關注添。
Gary又特登整咗一個有五十幾個地名、電影名同一般用語嘅港式與內地用語對照表，擔心香港人用得多內地用語，就會畀內地政府統戰喎。若然後果真係咁嚴重，咁講嘢成日夾雜英文同日語嘅香港人，咪仲畀英國同日本統治緊？