政情：行會「五小福」等堆填
擴建將軍澳、屯門及打鼓嶺三個堆填區的撥款日前全軍覆沒，事後有人歸咎政務司司長林鄭月娥同環境局局長黃錦星判斷失誤，太早「跪低」撤回將軍澳堆填區撥款，令餘下嘅屯門同打鼓嶺撥款亦如骨牌般冧低。亦有人批評身兼屯門區議會主席嘅鄉議局主席劉皇發，以及一向針對新政府嘅自由黨與廠商會林大輝等建制派先後「轉軚」，先令政府兵敗如山倒。不過亦有人認為，行政會議內五名有政團背景嘅非官守成員，最後一票都箍唔到，集體失職，先至最抵打，應該一車過全部送去堆填區處理。
棠哥翹埋手 李慧琼失蹤
行會「五小福」率先唔交功課嘅，首推最資深嘅工聯會榮譽會長鄭耀棠，皆因工聯會喺立法會嗰六票，一早就硬晒軚話要反對三項撥款，完全無得傾。其實早喺上次長者生活津貼拉布戰，棠哥同工聯會已備受政府同建制派支持者批評，質疑佢哋夾埋泛民一齊反政府，今次堆填區撥款，棠哥好似完全無出過力箍票，罪加一等。
喺立法會只有兩票嘅新民黨，該黨主席葉劉淑儀只有田北辰一票要箍，但最後都係交唔到貨。田北辰起初講只要政府肯承諾立法密封垃圾車，佢嗰票就有得傾，但最後政府作出相關承諾，佢依舊係三項撥款都反對。
至於港府最堅實嘅聯盟民建聯，今次表現亦十分甩轆。雖然佢哋最後力抗黨內屯門區議員嘅反對聲音，企硬支持屯門同打鼓嶺堆填區撥款，但如果佢哋當初唔係為咗選票考慮，表態反對將軍澳撥款，班屯門居民就唔會大叫不公，繼而有樣學樣，大玩包圍立法會同絕食抗議。而且呢啲涉及全港居民利益嘅問題，理應由該黨唯一嘅「超級議員」李慧琼（Starry）代言，但偏偏身兼行會成員嘅Starry，喺今次事件好似失咗蹤咁，反而要由本身來自屯門區、有角色衝突嘅黨主席譚耀宗領軍處理事件，不禁令人問Starry喺黨內有幾大影響力。
張學明林健鋒搞唔掂發叔
不過講到最離譜嘅，都係兩個行會成員都搞唔掂一個劉皇發。須知行會內有一位叫做張學明嘅鄉議局副主席，但佢喺今次爭議中，由頭都尾都唔見影，最離譜係由佢揸fit嘅大埔鄉，居然連同其他廿六個鄉事委員會，一齊聯署登報反對擴建屯門及打鼓嶺堆填區。至於代表經民聯入行會嘅林健鋒（Jeffrey），其實大可建議畀發叔豁免投票，經民聯其餘六票繼續撐政府擴建，但佢哋最後居然反過來跟隨發叔「轉軚」，認真無品。睇嚟特首梁振英真係應該趁呢個暑假，好好諗吓點樣改組行會！