中環出更：重拾太極樂 李少光後生晒
前保安局局長李少光退休後當選為港區全國人大，亦係健康快車副主席，佢前日（14日）就係以呢個身份出席「武林群英匯光明」活動，為內地貧困白內障病人重拾視力籌款。見光哥紅光滿面，秘訣全靠佢重拾太極嘅樂趣，所以愈嚟愈年輕。
助養生 「豬腩肉」消失
原來熱愛打高爾夫球嘅李少光，十多年前曾迷上打太極，仲一直持之以恒，勤力練習，之前做咗保安局局長，因為工作太忙，被迫放棄。直至近年退休，時間多咗，心情輕鬆咗，決定重拾愛好。耍太極有助養生，好處多不勝數，見光哥體格健碩，精神奕奕，退休後身上無半點「豬腩肉」，就知耍太極幫助幾大嘞。
講番個武術匯演，吸引逾百位來自地區嘅武林高手出現，有人舞扇、舞劍，亦有曾奪世界級錦標賽獎項嘅醒獅隊一展身手，合共為健康快車籌得一百六十萬元。
李少光謙稱唔識武功，未有粉墨登場，但係佢最鍾意睇嘅武術，係醒獅表演，話夠晒氣勢喎。
卓妮